បុរស​ម្នាក់​ បាន​ប្តឹង​ Heineken ថា​ក្នុង​កំប៉ុង​ស្រាបៀ​គាត់​​មាន​តុកកែ​

បុរស​ម្នាក់​បាន​សម្រេច​ដាក់​ពាក្យ​បណ្ដឹង ក្រុម​ហ៊ុន Heineken និង ហាង​លក់​ភេសជ្ជៈ នៅ​ទីក្រុង​ Fountain Valley រដ្ឋ​កាលីហ្វ័រញ៉ា សហរដ្ឋអាមេរិក ថា​ក្នុង​កំប៉ុង​​ស្រាបៀ ដែល​គាត់​បាន​ពិសា​ មាន​តុកកែ​២​នៅ​ខាងក្នុង។ បើ​តាម​ការ​ចុះផ្សាយ​របស់​ Business Insider ពាក់​កណ្ដាល​សប្ដាហ៍​នេះ។

ប្រភព​បាន​បន្ត​ថា តុកកែ​នេះ​ទំនង​ជា​បាន​ចូល​ទៅ​ក្នុង​កំប៉ុង​ស្រាបៀ​ នៅ​ពេល​សង្វាក់​ផលិត​កម្ម​កំពុង​ដំណើរ​ការ មុន​ពេល​ស្រាបៀ​ត្រូវ​បាន​គេ​ច្រក​ចូល​កំប៉ុង និង បិទ​គ្រប​ពួក​វា​នៅ​ក្នុង​នោះ​។ បុរស​មាន​ឈ្មោះ Toubbeh បាន​និយាយ​ថា​ គាត់​បាន​ទិញ​ស្រាបៀ​​ Heineken ប៉ុន្មាន​កំប៉ុង​ពី​ហាង​លក់​ភេសជ្ជៈ​យីហោ​ Ralph របស់​ម្ចាស់​ហាង​ឈ្មោះ​ Kroger ហើយ​គាត់​ចាប់​ផ្ដើម​រាករូស និង ក្អួត​ភ្លាម​ៗ​បន្ទាប់​ពី​ផឹក​បាន​បន្តិច​ ហើយ​កូន​​ស្រី​លោក​បាន​រក​ឃើញ​ថា នៅ​ក្នុង​កំប៉ុង​ស្រាបៀ​មាន​តុកកែ២ ដែល​មាន​សភាព​ដូច​តុកកែ​ត្រាំ​ស្រា​។ ក្រោយ​មក​លោក​ មាន​ជំងឺ​ធ្ងន់ធ្ងរ​ ដែល​ត្រូវ​បញ្ជូន​ទៅ​បន្ទប់​សង្គ្រោះ​បន្ទាន់ ដោយសារ​ឈឺពោះ​ និង​ រមួល​ខ្លាំង​ដល់​បាត់​ស្មារតី ហើយ​​ក្រោយ​មក​ លោក​ចេះ​តែ​មាន​អាការៈ​ថប់​ៗ​ និង តានតឹង (post traumatic stress disorder "PTSD")។ លោក Toubbeh កំពុង​ទាមទារ​​ឱ្យ​ក្រុមហ៊ុន Heineken និង​ដេប៉ូ​ចែកចាយ​បង់ថ្លៃ​ព្យាបាល ចេញ​ប្រាក់​ខាត​បង់​ដែល​លោក​មិន​បាន​បំពេញ​ការងារ​ និង ការ​ខូចខាត​ផ្សេងៗ​ទៀត។ Heineken អះអាង​ថា​ ការ​ទាមទារ​របស់​បុរស​នេះ ជា​រឿង​គួរ​ឲ្យ​អស់​សំណើច។