ចិន គ្រោងនឹង​បង្ហោះ​ផ្កាយរណប ១៥៦​គ្រឿង ដើម្បី​បង្កើន​សេវា​អ៊ីនធឺណេត

ចិន គ្រោងនឹង​បាញ់​បង្ហោះ​ផ្កាយ​រណប​តូចៗ​ចំនួន ១៥៦​គ្រឿង នៅលើ​គន្លង​ផែនដី​ទាប ត្រឹមឆ្នាំ​២០២៥ ដើម្បី​ផ្តល់​សេវា​អ៊ីនធឺណេត។ នេះ​បើតាម​ការ​ប្រកាស​របស់​ក្រុមហ៊ុន​សាជីវកម្ម​ឧស្សាហកម្ម និង​វិទ្យាសាស្រ្ត​អវកាស​ចិន កាលពី​ថ្ងៃទី​៣១​សីហា។ ក្នុង​សេចក្តី​ប្រកាស​នោះ បាន​បញ្ជាក់​ថា ប្រជាជន​ជាង​ពាក់​កណ្តាល​នៅលើ​ពិភពលោក​គ្មាន​អ៊ីនធឺណេត​ប្រើប្រាស់ និង​ខ្វះការ​ទទួល​បាន​ព័ត៌មាន​ពីការ​អភិវឌ្ឍ​នានា គឺ​ដោយសារ​តែ​លក្ខខណ្ឌ​តំបន់​ដូចជា​វាលខ្សាច់ ភ្នំ និង​សមុទ្រ។

វា​នឹង​ក្លាយជា​ប្រព័ន្ធ​ដំណើរការ​អ៊ីនធឺណេត​ទីមួយ​របស់​ចិន ដែលមាន​ផ្កាយ​រណប​តូចៗ នៅលើ​គន្លង​ផែនដី​ទាប ហើយ​ក៏នឹង​ជួយ​បំពេញ​តម្រូវការ​អភិវឌ្ឍន៍​អវកាស​ពាណិជ្ជកម្ម​ផងដែរ។ គម្រោង​នេះ ត្រូវបាន​ហៅថា «Hongyun» ដោយ​ចិន គ្រោង​នឹង​បាញ់​បង្ហោះ​ផ្កាយ​រណប​ទី១ នៅឆ្នាំ​២០១៨ ហើយ ៤គ្រឿង​បន្ទាប់ នៅឆ្នាំ​២០២០។ ពីឆ្នាំ​២០២១ ដល់ ២០២៥ ចិន នឹង​មាន​ផ្កាយរណប ១៥៦​គ្រឿង សម្រាប់​ប្រតិបត្តិការ៕