មេដឹកនាំកម្ពុជា-ថៃ នឹងសម្ពោធសួនមិត្តភាព និងចុះកិច្ចព្រមព្រៀងសំខាន់ៗ

សម្តេចនាយករដ្ឋមន្រ្តី ហ៊ុន សែន និងលោក ប្រាយុទ្ធ ចាន់អូចា នាយករដ្ឋមន្រ្តីថៃ នឹងអញ្ជើញសម្ពោធសួនមិត្តភាព កម្ពុជា-ថៃ ក្នុងអំឡុងទស្សនកិច្ចរបស់លោកប្រាយុទ្ធ នៅកម្ពុជា នាថ្ងៃទី៧កញ្ញាខាងមុខ។ នេះបើតាមលោក ផែ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានឲ្យដឹងនៅថ្ងៃទី១កញ្ញានេះ។ លោក ផៃ ស៊ីផាន បញ្ជាក់ថា ក្នុងដំណើរទស្សនកិច្ចផ្លូវរដ្ឋរបស់លោក ប្រាយុទ្ធ នឹងមានការចុះហត្ថលេខានៅលើអនុស្សារណៈយោគយល់គ្នា ពាក់ព័ន្ធនឹងកិច្ចសហប្រតិបត្តិការលើវិស័យសេដ្ឋកិច្ច និងវិស័យមួយចំនួនទៀត។

លោក ប្រាយុទ្ធ ចាន់អូចា មកទស្សនកិច្ចនៅកម្ពុជាលើកទី១ នៅចុងខែតុលា ឆ្នាំ២០១៤

បើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី១កញ្ញានេះ ឲ្យដឹងថា មេដឹកនាំទាំង២ នឹងអញ្ជើញធ្វើជាសហប្រធានកិច្ចប្រជុំចង្អៀតគណៈរដ្ឋមន្រ្តីចម្រុះកម្ពុជា-ថៃ លើកទី៣ ក្រោមមូលបទ «ពង្រឹងភាពជាដៃគូ ដើម្បីសន្តិភាព និងវិបុលភាព»។ កិច្ចប្រជុំចង្អៀតនេះ នឹងផ្ដល់មគ្គុទេសក៍ និងទិសដៅ ក្នុងការជំរុញបន្ថែមទៀតនូវ ទំនាក់ទំនង និងកិច្ចសហប្រតិបត្តិការដ៏ល្អប្រសើរ ដែលនឹងផ្តល់ផលប្រយោជន៍ ថែម១កម្រិតទៀត ដល់ប្រទេសទាំង២៕