សុខ សោម៉ាវត្តី ប្តូរមកសម្តែងជាតួយាយចាស់អ៊ីចឹងទៅ ប្លែកម្យ៉ាងដែរ !

ពេលនេះ តារាសម្តែង និង ពិធីការិនីរូបស្រស់ សុខ សោម៉ាវត្តី កំពុងមានវត្តមាននៅក្នុងរឿងភាគទូរទស្សន៍បាយ័នរឿង «លោកយាយកំពូលស្នេហ៍» ដោយនាងគ្រងតំណែងជាតួឯកជាមួយលោក ជា វណ្ណារិទ្ធ ។ នៅក្នុងរឿងភាគមួយនេះ សុខ សោម៉ាវត្តី សម្តែងជាតួលោកយាយប្រជ្រុយធំ ។ មហាជនជាច្រើនបាននិយាយថា សុខ សោម៉ាវត្តី សម្តែងតួយាយបានសក្តិសមគួរឱ្យសរសើរ ពិតជាមានសមត្ថភាពមែន ។កន្លងមកគេធ្លាប់តែឃើញពិធីការិនី សុខ សោម៉ាវត្តី សម្តែងជាតួដែលមានចរិតកាចឆ្នាសឆ្នើម ស្លូតបូត និង ជាតួក្មេង ដែលមានចរិត រឡិក រឡក់ពូកែឌឺ ក្រម៉ិចក្រម៉ើមជាដើម ។ តែសម្រាប់រឿងភាគមួយនេះ សុខ សោម៉ាវត្តី សម្តែងជាតួយាយ ដែលមានការតុបតែងខ្លួនជាមនុស្សចាស់ និង មានកាន់ឈើច្រត់ទៀតផង ។

ទោះបីជាមានការប្រើប្រាស់សម្លេងផ្ទាល់ក្តី តែគេមើលឃើញថា សុខ សោម៉ាវត្តី ពិតជាសម្តែងបានចូលតួល្អជាមួយតួបែបនេះ មើលទៅដូចជាមិនប្រឹង ឬ ឆ្គងនោះទេ ។ មិនមែនជាលើកទីមួយទេ ដែល សុខ សោម៉ាវត្តី និង លោក ជា វណ្ណា រិទ្ធ បានសម្តែងរួមគ្នា ។ សុខ សោម៉ាវត្តី រំពឹងថា រឿងភាគមួយនេះនឹងទទួលបានជោគជ័យ ជាមួយនឹងការសម្តែងជាមនុស្សចាស់ ។ រឿងភាគមួយនេះ ជាការនិពន្ធរបស់លោក ហ៊ុយ វាសនា ។ទោះបីក្លាយជាអ្នកម្តាយក៏ពិតមែន តែ សុខ សោម៉ាវត្តី នៅតែមានសម្រស់ស្រស់ស្អាត រូបរាងតូចច្រឡឹង ជាពិសេសនៅពេលនាងតុបតែងខ្លួនបែបឡូយឆាយ សិចស៊ី មើលទៅគួរឱ្យខ្នក់ខ្នាញ់មិនចាញ់តារាស្រករក្រោយប៉ុន្មានឡើយ ។ ដោយសារតែបែបនេះហើយ ទើបទីផ្សារនៃការថតរឿងរបស់ សុខ សោម៉ាវត្តី នៅតែមានសន្ទុះ ។

សុខ សោម៉ាវត្តី លេចមុខជាបន្តបន្ទាប់នៅក្នុងរឿងដុំ និង រឿងភាគក្នុងតំណែងជាតួឯក ។ សព្វថ្ងៃនេះ សុខ សោម៉ាវត្តី កំពុងសម្រុកថតរឿង« ក្មេងទី ៦ » របស់ផលិតកម្ម Clip Media ។ ក្រៅពីសម្តែងរឿង សុខ សោម៉ាវត្តី ក៏ជាពិធីការិនី ដ៏លេចធ្លោ នៅស្ថានីយទូរទស្សន៍បាយ័នផងដែរ ៕ ប្រភពពីទស្សនាវត្តីប្រជាប្រិយ