នាយកដ្ឋាន​អត្តសញ្ញាណកម្ម ប្រាប់ពី​ចំនួន​អ្នកដែល​ទទួល​បាន​អត្តសញ្ញាណបណ្ណ

លោក ឃៀង សុគន្ធា ប្រធាន​នាយកដ្ឋាន​អត្ត​សញ្ញាណកម្ម នៃ​ក្រសួង​មហាផ្ទៃ បាន​អះអាង​ថា រហូត​មកដល់​ពេលនេះ នាយកដ្ឋាន បាន​ចែក​អត្តសញ្ញាណ​បណ្ណ​សញ្ជាតិ​ខ្មែរ​ជូន​ប្រជាពលរដ្ឋ​ចំនួន ៩,៤៦លាន​នាក់ហើយ ក្នុងឆ្នាំ​២០១៧នេះ។ ចំនួន​នេះ នៅសល់​មិនដល់ ១លាន​នាក់​ឡើយ ដោយ​នាយកដ្ឋាន​នេះ នឹង​បន្ត​ចែក​ជូន​ឲ្យបាន​គ្រប់គ្នា​មុន​ដាច់​ឆ្នាំ ២០១៧​នេះ។ទន្ទឹម​នឹងនេះ ប្រធាន គ.ជ. ប លោក ស៊ិក ប៊ុនហុក បាន​និយាយ​ថា អត្ត​សញ្ញាណបណ្ណ​សញ្ជាតិ​ខ្មែរ គឺជា​ឯកសារ​ចម្បង​តែមួយ​គត់​សម្រាប់​ប្រើប្រាស់​ដល់​ការ​ចុះឈ្មោះ​បោះឆ្នោត​ និង​បោះឆ្នោត។

ថ្លែង​ក្នុង​កិច្ចប្រជុំ​ពិគ្រោះ​យោបល់​អំពី​សេចក្តី​ព្រាង​បទបញ្ជា និង​នីតិ​សម្រាប់​នីតិវិធី​សម្រាប់​ការធ្វើ​បច្ចុប្បន្ន​ភាព​បញ្ជី​បោះឆ្នោត និង​ការ​ចុះឈ្មោះ​បោះឆ្នោត ឆ្នាំ​២០១៧ កាលពី​ថ្ងៃទី៣សីហា​ម្សិលមិញ​នេះ លោក ស៊ិក ប៊ុនហុក បាន​ជំរុញ​ឲ្យ​អគ្គនាយកដ្ឋាន​អត្តសញ្ញាណកម្ម ពន្លឿន​ការ​ធ្វើ និង​ផ្តល់​អត្ត​សញ្ញាណបណ្ណ ជូន​ប្រជាពលរដ្ឋ​ខ្មែរ​ឲ្យបាន​គ្រប់គ្នា។សូម​បញ្ជាក់​ថា ការធ្វើ​បច្ចុប្បន្នភាព​បញ្ជី​បោះឆ្នោត​ថ្មី និង​ការ​ចុះឈ្មោះ​បោះឆ្នោត ឆ្នាំ​២០១៧ នឹង​ចាប់ផ្តើម ធ្វើឡើង​ពីថ្ងៃទី១​កញ្ញា ដល់ ៩​វិច្ឆិកា ឆ្នាំ២០១៧ ដើម្បី​មាន​សិទ្ធិ​បោះឆ្នោត​ជ្រើសតាំង​តំណាងរាស្រ្ត​អាណត្តិ​ទី៦ នៃ​រដ្ឋសភា នៅថ្ងៃទី​២៩ កក្កដា ២០១៨៕