កាមេរ៉ា​ឆ្លាតវៃ​ក្នុង​ផ្ទះ ម៉ូដែល​ថ្មី​របស់ Xiaomi តម្លៃ​ត្រឹម​ ២២ដុល្លារ

ក្រុមហ៊ុន XIAOMI របស់​ប្រទេស​ចិន ទើប​តែ​បាន​ធ្វើ​ការ​ប្រកាស​ចេញ​លក់​នូវ​ប្រភេទ​កាមេរ៉ា​ឆ្លាតវៃ​សម្រាប់​ប្រើប្រាស់​ត្រួតពិនិត្យ​ក្នុង​ផ្ទះ ម៉ូដែល 1080p PTZ Smart Camera។ វា​មាន​វិមាត្រ ១២៧,៥x៦០x៦០មម មាន​ទម្ងន់ ២៤៩ ក្រាម ហើយ​ដំណើរការ​គាំទ្រ​ជាមួយ​ឧបករណ៍ Android 4.0 និង iOS 8.0 ឬ​ខ្ពស់​ជាង​នេះ។ ភ្ជាប់​នូវ​ប្រព័ន្ធ WiFi 2.4GHz អាច​ត​ភ្ជាប់​ជាមួយ microSD និង​មាន​រន្ធ​ដោត USB ខ្ពស់​បំផុត​ត្រឹម 32GB។

កាមេរ៉ា​នេះ​មាន​ Aperture f/2.3 អាច​ផ្ដិត​យក​រូបភាព​ក្នុង​ទម្រង់ ៩៣ ដឺក្រេ ងាយ​ស្រួល​ត្រួតពិនិត្យ​ប្រព័ន្ធ​សុវត្ថិភាព​ក្នុង​ផ្ទះ និង​តាម​ដាន​កូនៗ ក៏​ដូច​ជា​សត្វ​ចិញ្ចឹម​របស់​លោក​អ្នក។ រាល់​ឯកសារ​ដែល​បាន​ថត​ចេញ​ យើង​អាច​ធ្វើ​ការ​រក្សា​ទុក​ជាមួយ​ប្រព័ន្ធ Cloud ឬ​ភ្ជាប់​ជាមួយ​ឧបករណ៍ NAS។ តម្លៃ​ចាប់​ផ្ដើម​ពី ២២ ដុល្លារ ឬ ១៤៩ យន់ ហើយ​ដាក់​លក់​នា​ថ្ងៃ​ទី ១២ កញ្ញា​ត​ទៅ៕​