ក្រសួងមហាផ្ទៃ បើកការស៊ើបអង្កេត ការបង្ហោះព័ត៌មានចាប់ក្មេងលើហ្វេសប៊ុក

ក្រសួងមហាផ្ទៃ និងនាយកដ្ឋានជំនាញ នៃអគ្គស្នងការនគរបាលជាតិ បានបើកការស៊ើបអង្កេតចំពោះក្រុមអង្គការចាត់តាំងដែលបានផ្សព្វផ្សាយបំប៉ោងព័ត៍មានអំពីករណីចាប់កូនក្មេងនៅតាមបណ្តារាជធានី-ខេត្ត មួយចំនួន ដែលបង្កឲ្យមានការភ្ញាក់ផ្អើល និងភ័ន្តច្រឡំ និងបង្កឲ្យមានភាពវឹកវរ។ លោក ខៀវ សុភ័គ អ្នកនាំពាក្យក្រសួងមហាផ្ទៃ បានសង្ស័យថា មានក្រុមចាត់តាំងណាមួយកំពុងធ្វើការផ្សព្វផ្សាយភូតកុហកកាន់តែច្រើន អំពីករណីចាប់ក្មេង ដែលធ្វើឱ្យមានភាពវឹកវរ។ លោកអះអាងថា បន្ទាប់ពីធ្វើការស្រាវជ្រាវរហូតដល់ពេលនេះ មិនមានករណីចាប់ក្មេងណាមួយកើតឡើងទេ។

លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ

លោកបានអំពាវនាវដល់ប្រជាពលរដ្ឋថា បើសិនជាមានករណីចាប់ក្មេង ត្រូវរាយការណ៍ជាបន្ទាន់ទៅអាជ្ញាធរមានសមត្ថកិច្ច ដូចដែលបានប្រកាសដោយក្រសួងមហាផ្ទៃ នាពេលកន្លងមក។ លោកបញ្ជាក់ថា ក្រសួងមហាផ្ទៃមិនទាន់ទទួលបានរបាយការណ៍ជាក់លាក់ ឬពាក្យបណ្តឹង ពីស្នងការតាមបណ្តាខេត្តណាមួយដាក់មកក្រសួងមហាផ្ទៃនៅឡើយទេ ទាក់ទងនឹងករណីចាប់ក្មេងវះយកសិរីរាង្គ ដែលមានការភា្ញក់ផ្អើលជាបន្តបន្ទាប់នាប៉ុន្មានសប្តាហ៍កន្លងទៅនេះ។ ករណីចាប់ក្មេងដែលលេចលឺតៗគ្នាតាមហ្វេសប៊ុក គឺជាពាក្យចចាមអារាមតែប៉ុណ្ណោះ៕