រឿងបង្ហោះវីដេអូចាប់ក្មេង ប៉ូលិសចាប់ខ្លួនសកម្មជន CNRP នៅខេត្តកំពង់ធំ

ប៉ូលិសខេត្តកំពង់ធំ បានឃាត់ខ្លួនសកម្មជនគណបក្សសង្គ្រោះជាតិ ម្នាក់យកទៅសាកសួរនៅស្នងការនគរបាលខេត្តកំពង់ធំ កាលពីព្រឹកថ្ងៃទី៣០ ខែកក្កដា ឆ្នាំ២០១៧ នេះ ពាក់ព័ន្ធនឹងករណីបង្ហោះវីដេអូប្រជាពលរដ្ឋព្រួតគ្នាវាយជនសង្ស័យ២នាក់ថាចាប់ក្មេង បង្កឲ្យមានការភ្ញាក់ផ្អើល។ សកម្មជនគណបក្សសង្គ្រោះជាតិ ដែលប៉ូលិសចាប់ខ្លួនមានឈ្មោះ ណៃ ស៊ីណេង ជាសមាជិកក្រុមការងារ ចុះជួយស្រុកប្រាសាទសំបូរ និងក្រុងស្ទឹងសែន។

លោក អ៊ុក កុសល ស្នងការនគរបាលខេត្តកំពង់ធំ បានឲ្យដឹងមុននេះបន្តិចថា ពិតជាមានការចាប់ខ្លួនបុរសម្នាក់នេះមែន យកទៅសាកសួរនៅស្នងការនគរបាលខេត្ត ពាក់ព័ន្ធនឹងករណីនេះ។ លោកបញ្ជាក់ថា សមត្ថកិច្ចបានហៅទៅធ្វើការសួរនាំនៅស្នងការខេត្ត ព្រោះគាត់ជាម្ចាស់ផេក។ ស្នងការនគរបាលខេត្តកំពង់ធំ បានឲ្យដឹងថា នៅលើគណនី Facbook របស់ ឈ្មោះ Nay Sineng បានសរសេរពាក្យពេចន៍យ៉ាងដូច្នេះថា «ស្រុកបារាយណ៍ រសៀលថ្ងៃទី២៨.០៧.២០១៧. នៅរសៀលនេះ មានករណីជនជាតិយួន ៣នាក់ ចាប់កូនក្មេងវះយកក្រលៀន និងភ្នែក ត្រូវបានប្រជាជនចាប់បានចំនួន ២នាក់ និងរត់រួច ១នាក់។ ករណីនេះកើតឡើងនៅភូមិអណ្ដូងពោ ឃុំគ្រើល ស្រុកបារាយណ៍ ខេត្តកំពង់ធំ។ សូមបងប្អូនមានការប្រុងប្រយ័ត្នឲ្យបានខ្ពស់ ចំពោះកូនរបស់ពួកយើង ពីព្រោះពួកនេះសាហាវណាស់»។

លោក អ៊ុក កុសល អះអាងថា ឆ្លងកាត់ការស្រាវជ្រាវតាមជំនាញ ជនសង្ស័យទាំង២នាក់ ដែលកម្លាំងសមត្ថកិច្ចចាប់បាននោះ មិនមែនជាជនជាតិវៀតណាមដើរវះយកគ្រឿងក្នុងក្មេងៗឡើយ ពោលពួកគេគឺជាមុខសញ្ញាលួចម៉ូតូទៅវិញទេ ក្នុងចំណោម ២នាក់នោះ មានម្នាក់គឺត្រូវបានតុលាការចេញដីកាបង្គាប់ឲ្យចាប់ខ្លួនទៀតផង ដែលពួកគេមានឈ្មោះ មុត សុផាត អាយុ ៣៥ឆ្នាំ មានទីលំនៅភូមិមាសឈរ ឃុំចក ស្រុកកំពង់ត្របែក ខេត្តព្រៃវែង និងម្នាក់ទៀតឈ្មោះ ច័ន្ទ រដ្ឋ អាយុ ២៥ឆ្នាំ មានទីលំនៅភូមិឃុំជាមួយគ្នា៕